ديل دئيه بيلمير اورك سئوه‌ني،
عشقين، محبتين حؤكمونه بير باخ.
من سئوه بيلميرم مني سئوه‌ني،
منيمسه سئوديگيم سئوير اؤزگه‌ني.
اوشاقليق واختيندان سئويرم سني،
سنده وفالي اول اونوتما مني،
اوركدن دئييرم بو 4 كلمه‌ني،
ابدي اولاراق سئويرم سني.
من شاعر دئييلم باغيشلا مني.
من آنجاق يازيرام كؤنلوم دئيه‌ني
بو قيسا شعرله خاتيرلا مني
هله‌ليك، هله‌ليك اؤپورم سني!
هردنبير قاينايير يادلارا قانيم
هردن ده قيريلير اولان گومانيم
چوخدور سسله‌يه‌نيم چوخدور اومانيم
بير سندن اوميدي اوزه بيلميرم.
ظلمت گئجه‌لره قاريشسام دا من
كوسكون قيسمتيمله باريشسام دا من
هر يئري گزسم ده دولاشسام دا من
سن كئچن يئرلري گزه بيلميرم.
ساختا تبسسومون يوخ اولسا بئله
يالان محبتين اوخ اولسا بئله
"سئويرم" دئيه‌نيم چوخ اولسا بئله
سن دئين يالاني دئيه بيلميرم.
سئوگييه الويدا سؤيله‌سم ده من
نملي گؤزلريمي گيزله‌سم ده من
سندن قيصاص آلماق ايسته‌سم ده من
سندن اؤزگه‌سيني سئوه بيلميرم.
اولدوز يئددي ياشيندا
قارا چارشاب باشيندا
قوشولاراق كوكبه
يولا دوشدو مكتبه
معلم ايلك درسينه
ايقدام ائتدي ترسينه
آنا ديلين بوشلادي
آيري ديلده باشلادي
دئدي آچين كيتابي
بيلن وئرسين جاوابي
چؤره يي گؤستره رك
اولدوز سسلندي "چؤره ك" يوخ!
كوكب جاواب وئر: "نان"
اولدوز ائشيت٫ سنده قان!
سؤيله اولدوز! نه دير بو؟
اولدوز جاواب وئردي: "سو"
يوخ! كوكب سن وئر جاواب!
كوكب جاواب وئردي "آب"
كوكب سوينجه دولوب
اولدوزون رنگي سولوب
سولوب داياندي اولدوز
اولدوز تك ياندي اولدوز
ائوه گلنده آنا
اونو باسدي باغرينا
"آنا قوربانين اولسون
نه يازدين٫ نه اوخودون؟
" دن سو وئريب قوشونا
گئچدي سوفرا باشينا
"سوال وئردي آنا جان٫
بو "چؤره ك"دير يوخسا "نان"؟
بس بو نه دير "آب" مي "سو"؟
آنا جاواب وئردي "سو"
اولدوز سئوينديييندن
آناسىيلا اؤپوشدو
آنا باخيب اوزونه
سؤيله دي اؤز اؤزونه:
يا معلم آزيبدير!
يا كيتاب سهو يازيبدير!
بو بير سوزدور گولوم قالسين ياديندا
شيرين يا شور دوتارليق وار داديندا
حقيقت بير اوزون چايدير بورقلو
كي يوز يئرده ن كئچر يوز بير آديندا
ديوانه كونول گور نئجه ليلايه وورولدو
هر گون يئني بير لعبت رعنايه وورولدو
كنعان كيمي بير عمر اوزون تورپاقا قويدو
آخيرده آتيب ديني ني ترسايه وورولدو
هر گئجه م اولدو كدر غوصه فلاكت سن سيز
هر نفس چكديم هدر گئتدي او ساعت سن سيز
سنين او جلب ائله يه ن وصلينه آند ايچديم اينان
هيجرينه ياندي كونول يوخ داها راحت سن سيز
باشقا بير ياري نئجه آختاريم اي نازلي صنم
بيليره م سنده دئدين يوخ يارا حاجت سنسيز
سن منيم كونلومه حاكيم سنه قول اولدو كونول
سن عزيز سن من اوچون من هئچم آفت سن سيز
سن "نيظامي "ده ن اگر آرخايين اولساندا گولوم
گئجه گوندوز آراييب اولمادي راحت سنسيز
آفت = نيظامي نين حيات يولداشي